Oleh: A. St. Nan Bungsu
Dosen FISIP Unand
Kabarito.id – “Ado-ado sae usulan nan diwacanakan Pak Pati ko mah…namo bandara lo ka nyo ubah bagai…” kato Ajo Kari sambia masuak lapau Ajo Elok.
“Manga ajo mete-mete pagi ko…mangopi gai lah lu” sapo Ajo Elok.
“Yo, buek an lah den kopi ciek…takah biaso…saketek gulo yo” jawek Ajo Kari lo…
“Jadi baa manuruik ajo usulan Pak Pati tu, kan lai rancak tu nyo…” kato Ajo Elok lo sambia malatak an kopi di meja Ajo Kari.
“Waden bukan ndak menghormati, awak samo maharagoi dan mangakui namo baliau yang diusuakan Pak Pati tu yo…tapi manuruik den banyak kojo lain nan paralu diuruih lai. Iko ndak kojo ci kojo sae mah…lah iyo dan mantap namo bandara nan kini tu mah…lah tabawo sado alah awak di Minang ko…”
“Tapi itu kan lai bisa lo diuruih mah…” si Ramon yang sadang makan lontong gulai paku di meja subalah sato lo manyolo.
“Hehei yee…mauruih tuka namo bandara ndak karajo sepele tu doh…paralu serangkaian penyesuaian teknis penerbangan dan dokumen navigasi udara nan wajib dipabarui…ndak samo jo manuka namo jalan nan cukuik jo Perbup atau Perwako sae. Mangganti namo bandara ko ndak lo salasai jo Kementerian Perhubungan dan AirNav di Jakarta sajo doh. Iko juo malibatkan berbagai otoritas internasional yang takaik takah ICAO jo IATA…sudah tu call sign ATC harus lo barubah. Salain itu, paralu lo penyesuaian data pada sistem masiang-masiang maskapai. Ujuang-ujuangnyo kudian di tabik an lo Notice to Airmen nan maagiah tahu sadoalahe komunitas penerbangan global mengenai jadwal efektif namo dan namo panggilan ATC nan baru…bara lo abih enerji, wukatu, jo pitih gai mauruih tu tuw…” kato Ajo Kari lo panjang leba.
“Barek istilah-istilah nyo mah Jo…apo aratinyo tuw…” manyolo lo si Ramon ko liak jo nada cimeeh nan aluih.
“Tanyo se lah Mak Gugel…hp ang kan lai canggih lo mah…” jawek Mak Kari jo nada sliding tekel nan elegan ala Paolo Maldini – back Timnas Italia.
“Jadi baliak ka carito tadi, jaan dituka lo lai namo Bandara Internasional Minangkabau ko. Banyak kojo lain nan urgen nan musti diuruih dan disalasaian lai…” sambuang Ajo Kari lo sambia tagak ka mambayia kopi jo sala lauak nan lah dimakannyo ka Ajo Elok.
“Bia den sae lah mambayia kopi jo sala lauak ajo tuw…den traktir ajo sakali ko…lah tacerahan lo den dek penjelasan ajo santa ko, suai den mah…” kecek Ramon lo sambia mangode Ajo Elok untuak indak manarimo pitih Ajo Kari.
“Haa…tu yo santiang ang tu…Acok-acok se takah iko. Mokasi yo…” kato Ajo Kari ka si Ramon sambia galak manih dan malenggang maningga an lapau Ajo Elok. (*)
